estans des couverts, ils s’en fuirent et laisserent leurs sacs.
Mrs les archevesques d’Aix et de Bordeaux vindrent disner cheux moy.
Le mercredy 2me nous fusmes tenir conseil a la Saussaye.
Mr de Montbason vint a la rive de nostre digue voir mettre en mer neuf machines du Plessis.
Le jeudy 3me on posa autres neuf machines.
Le roy revint de Surgeres.
Le vendredy 4me le roy tint un grand conseil sur celuy que Chomberg donna d’attaquer la Rochelle par force, ce quy fut rejetté. Leroy parla tres bien en ce conseil, et monsieur le cardinal aussy.
Le samedy 5me je fus, bien accompagné, saluer messieurs de la chambre des comptes de Paris, logés a Angoulains, et puis je fus disner a la Saussaye cheux monsieur le cardinal que j’accompagnay a Netré ou l’on tint conseil, a la fin duquel messieurs de la chambre eurent audience, et en suitte les deputés de Provence quy parlerent par la bouche de Mr l’archevesque d’Aix.
Le soir ce capucin fils de la feu reine Margueritte et de Chanvallon, nommé pere Archange, me vint trouver, et me dire forces impertinences.
Le dimanche 6me monsieur le cardinal vint disner cheux moy, puis s’en alla sur les vaisseaux.
Le lundy 7me je fis mes travaux ordinaires[1].
Le mardy Mrs de Bordeaux et de Canaples vindrent disner cheux moy.
