au conseil avec monsieur le cardinal et peu d’autres, me dit que monsieur son frere s’en estant allé, quy avoit entrepris de faire un fort a Lafons[1] sans lequel la Rochelle n’estoit point assiegée, et qu’il s’estoit chargé d’assieger la ville depuis le marais de Lafons quy estoit la fin de mon departement jusques a Ronsay ou commençoit celuy de Mrs de Chomberg et d’Angoulesme et duquel le roy et monsieur le cardinal se chargeoint particulierement, et que l’ayant presenté a Mr d’Angoulesme pour s’y loger a la place de Monsieur et construire les forts, redouttes, et lignes necessaires, il luy avoit demandé cinq cens chevaux, et cinq mille hommes de pié, ne le voulant entreprendre avec moindres forces, lesquelles difficilement Sa Majesté luy pourroit maintenant fournir ; que sur ce sujet il m’avoit envoyé querir pour m’offrir d’adjouster tout ce departement au mien, et sçavoir quelles trouppes je demanderois d’augmentation a l’armée que j’avois desja, et quel secours de charrettes, d’outils, et d’autres choses, je demanderois de plus. Je luy respondis que j’avois de toutes choses a suffisance, sy le roy me commandoit de l’entreprendre, et que je luy fortifierois et retrancherois l’avenue de terre quy estoit encor libre aux Rochelois, de telle sorte que dans quinse jours je l’aurois fermée. Le roy creut que je me moquois en luy disant cela, et me repliqua que je luy demandasse librement, et sy je me voudrois contenter de trois regimens de plus et de trois compagnies de chevaux
- ↑ La Fond, village au nord de la Rochelle, aujourd’hui faubourg de cette ville. C’était un lieu bas et marécageux, dominé par un tertre où l'on voyait une garenne.
