leur ayant donné a disner, je les renvoyay au quartier du roy dans mon carrosse.
Le samedy 13me la tempeste ayant fait retirer les barques rocheloises, forces gens eurent moyen de revenir de l’isle. Les chevaux legers du roy repasserent de Ré en mon quartier. Monsieur vint au Plom voir les desbris de la tempeste.
Le dimanche 14me Marillac et quantité d’autres revindrent de l’isle coucher cheux moy.
Le lundy 15me je fus a Dampierre prendre congé de Monsieur, quy se retira de l’armée et s’en retourna a Paris. Je fus de là a Netré trouver le roy.
Tout le reste des trouppes quy estoint sous ma charge et que j’avois envoyées en Ré, furent ce jour là de retour en leurs quartiers.
J’allay ce mesme soir reconnestre une nouvelle ouverture que monsieur le cardinal vouloit estre faite au port Neuf, avec un marinier fort experimenté qu’il m’avoit envoyé, nommé Sanson.
Le mardy 16me Monsieur (quy avoit esté retenu le jour precedent par le roy), s’en alla de l’armée.
Le mercredy 17me je fus au Plom faire partir forces barques pour aller [en Ré][1] requerir ceux quy y estoint encores. Le comte de Burie[2] et forces autres revindrent [de l’isle][3] cheux moy.
Le roy m’envoya querir pour le venir trouver le lendemain matin, comme je fis, le jeudy 18me ; et estant
