quy furent justement d’autant de barques comme il en estoit party.
Monsieur demeura ce soir là a souper et coucher cheux moy, [et sur le minuit][1] comme il dormoit, il parut un grand feu par dessus le village de Saint Maurice quy est contre le Fort Louis. Je pensay que les ennemis estoint venus brusler ce peu de maisons quy restoint, et pour le respect de la personne de Monsieur, je fis prendre les armes aux trouppes françoises et suisses du quartier, cependant que j’accourus pour en sçavoir de plus seures nouvelles. Mais je fus bientost asseuré de mon doute, et apperceus que c’estoint quelques maisons de la Rochelle proche de la tour de Saint Bartelemi[2] ou des espions que nous avions dedans avoint mis le feu. Je fis en mesme temps tirer forces balles ardentes du Fort Louis pour divertir les ennemis d’esteindre leur feu.
Le dimanche 31me et dernier d’octobre, Monsieur disna cheux moy, puis s’en alla au Fort Louis ou il fit tirer forces canonnades. Les ennemis nous payerent en mesme monnoye ; mais nous eumes de plus d’un coup de canon quy donna dans le fort, dont le fils ayné de Mr de la Mauvissiere[3] fut tué, et un soldat quand et luy.
Novembre. — Le lundy jour de la Toussaints et premier de novembre, quattre barques des nostres char-
