fameux ouvriers, et mesmes fit venir quelques architectes en France pour ce sujet. Mais aucun dessin que l’on luy eut presenté ne peut egaler son desir, ny la despense qu’elle y destinoit. Il est apparent qu’elle n’y eut pas espargné quelque grande somme des finances du roy, dont elle disposoit comme regente, puis que de ses deniers propres elle a employé trente mille escus pour eriger en bronse sur le Pont Neuf sa statue a cheval. Monseigneur quy preside en cette assemblée, et Mr le cardinal de la Vallette, ont veu comme moy les differens modelles de cette sepulture faits par le commandement du roy, quy n’ont jamais eu l’entiere approbation, et que l’esperance d’en avoir de plus magnifiques a fait rejetter, ce quy vous doit faire croire que Sa Majesté ny la reine sa mere n’ont manqué de soin, de volonté, ny de moyens, pour faire cette œuvre, mais d’ouvriers et d’invention, et que l’avis que sur ce sujet vous pensés luy donner, est un reproche indigne de la pieté de l’un et de l’affection de l’autre, que des serviteurs ne doivent pas mesmes penser de faire a leur maitre, et quy infailliblement et avec juste rayson seroit mal receu. »
« Mon avis est que la grande retenue et moderation du roy en ce quy regarde ses bastimens, doit estre approuvée et louée par cette compagnie, laquelle le doit conseiller et exhorter de bien entretenir et empescher de ruine ceux que ses predecesseurs luy ont edifiés, et qu’il ne soit fait aucune mention de la sepulture du feu roy son pere, de laquelle il a un soin tres particulier. »
A peine eus je achevé de dire mon avis que pres de soissante notables quy avoint donné le leur devant moy, revindrent au mien quy fut approuvé, et passé,
