J’escrivis au duc sur le sujet de mon affaire : puis je fus trouver la reine pour luy montrer la copie de ce que j’avois mandé. Le soir le duc envoya Montagu souper cheux moy, et m'asseurer de sa part qu'il accommoderoit les affaires selon mon desir, dont j’envoyay en mesme temps donner avis a la reine.
Le jeudy 5me le secretaire Convé me vint dire que je vinsse le lendemain au conseil, ou j’aurois une finale response de ma proposition. Je fus en suitte cheux madame de Strange.
Le vendredy 6me le duc vint disner cheux moy, puis me mena a la court en une des chambres du roy, ou il laissa Gorin, Montagu et Lucnar pour m’entretenir. Il me vint peu apres trouver, et me dit que la response que le conseil me vouloit faire ne valoit rien, mais que je ne me misse pas en peine, ains y respondisse sur l’heure mesme fermement, et que puis apres il accommoderoit le tout de telle sorte que j'en serois satisfait. Peu apres le secretaire Convé me vint appeller pour aller au conseil, là ou apres que l’on m’eut fait mettre en une chaire au haut bout, messieurs du conseil, par la bouche de Carleton, me firent dire qu’apres avoir deliberé sur la proposition que j’avois faite au mesme conseil quelques jours auparavant, ils me faisoint la response qu’ils me donnerent par escrit, et en suitte la firent lire : sur quoy leur ayant demandé audience pour leur respondre sur le champ[1], je le fis avec grande vehemence, et mieux a mon gré que je ne parlay de ma vie. Ma response dura plus d’une heure : puis estant sorty, j’allay trouver la reine pour
- ↑ Il y avait aux précédentes éditions : sur ce chapitre.
