vint souper avec moy, et le lendemain le sieur Edouart Cecile viscomte de Houemelton[1] que j’avois connu jeune en Italie, et quy m’avoit desja trente ans auparavant[2] fait beaucoup de courtesie en Angleterre.
Le dimanche 11me Mr le comte de Carlile me vint trouver avec les carrosses du roy pour me mener a Amptoncourt [a l’audience du roy. Je fus conduit dans Amptoncourt][3] dans une salle ou il y avoit une belle collation. Le duc de Bocquinguem m’y vint trouver pour me mener a l’audience, et me dit que le roy vouloit precedemment sçavoir ce que je luy voulois dire, et qu’il ne vouloit pas que je luy parlasse d’aucune affaire, qu’autrement il ne me donneroit point d’audience. Je luy dis que le roy sçauroit ce que je luy avois a dire par ma propre bouche, et que l’on ne limitoit point ce qu’un ambassadeur avoit a representer au prince vers lequel il estoit envoyé ; et que s’il ne me vouloit voir, que j’estois prest de m’en retourner. Il me jura que la seule cause quy l'oblígeoit a cela, et quy l’y faisoit opiniatrer, estoit qu'il ne se pourroit empescher de se mettre en colere en traittant des affaires dont j’avois a luy parler, ce quy ne seroit pas bienseant sur ce haut dais a la veue des principaux du royaume, hommes et femmes ; que la reine sa femme estoit aupres de luy, quy, animée du licenciement de ses domestiques, pourroit faire quelque
