dans la berge du roy, m'agnmena jusques proche de la Tour de Londres, ou les carrosses du roy m’attendoint, quy me menerent en mon logis ou ledit comte Dorset me quitta. Je ne fus logé ny deffrayé par le roy, et a peine peut on envoyer ce comte Dorset, selon la coustume ordinaire, pour me recevoir. Je ne laissay pour cela d’estre assés bien logé, meublé, et accommodé.
Ce soir mesme, après que j’eus souppé, on fit dire au chevalier de Jars quy avoit souppé avec moy, que quelqu’un le demandoit. C’estoit le duc de Bocquinguem, et Montagu, quy seuls estoint venus me voir sans flambeaux et le prierent de les faire entrer en ma chambre par quelque porte secrette, ce qu’il fit et puis me vint querir. Je fus bien estonné de le voir là[1] parce que je sçavois qu'il estoit a Amptoncourt[2] avec le roy : mais il en estoit arrivé pour me voir. Il me fit d’abbord forces plaintes de la France, puis de moy aussy sur le sujet de quelques personnes ; ausquelles je respondis le mieux que je peus, et puis fis celles de la France contre l’Angleterre qu’il escusa aussy le mieux qu’il peut, et en suitte me promit toute sorte d’assistance et d’amitié, comme je luy fis aussy offre bien ample de mon service. Il me pria de ne point dire qu’il me fut venu voir parce qu’il l’avoit fait a l’insceu du roy, ce que je ne creus pas.
Le jeudy 8me l'ambassadeur Contarini, de Venise, me vint visiter, et sur la nuit j’allay voir Mr le duc de
