madame de Guyse bien accompagnée, pour venir a la court.
Comme le roy estoit a Blois, on faisoit soigneusement prendre garde aux actions de Monsieur, et espier quy luy parloit. On descouvrit que Chalais quy estoit mestre de la garde robbe du roy et logé dans le chasteau proche de l'appartement de Monsieur, l’alloit voir la nuit en robbe de chambre et apres avoir demeuré deux ou trois heures avesques luy s’en retournoit en cachette, ce quy fit connestre au roy qu’il jouoit le double. Sur cela la court partit de Blois et vint a Tours[1], et Monsieur ayant perdu l'esperance d’avoir les villes du Havre ou de Laon pour sa retraitte de la court, tenta par le moyen de Chalais celle de Mets, quy y despescha un gentilhomme nommé la Loubiere[2] que les Gramonts luy avoint donné. Ce la Loubiere vint dire adieu au comte de Louvigné[3] avec quy il avoit esté, et le connoissant parfait amy de Chalais, ne se feignit point de luy dire ou il alloit, et pour quel sujet. De Tours le roy s’achemina par la riviere de Loire a Saumur[4], et par les chemins Louvigné eut quelque chose a desmesler avec Mr de Candale avec quy il n’estoit pas bien pour quelques amourettes[5] : neammoins cela se passa sans bruit.
- ↑ Le 27 juin.
- ↑ Peut-être N. de Castelnau, seigneur de la Loubère.
- ↑ Roger de Gramont, comte de Louvigny, second fils d’Antoine, comte de Gramont, de Guiche et de Louvigny, vicomte d’Aster, et de Louise de Roquelaure, sa première femme, fut tué en duel le 18 mars 1629.
- ↑ Le 28 juin.
- ↑ Le comte de Candale et le comte de Louvigny aimaient la duchesse de Rohan.
