la guerre au roy d’Espaigne quy en estoit injuste detenteur. Le roy d’Angleterre d’un autre costé pressoit le roy de faire ligue offensive et deffensive avec luy contre le roy d’Espaigne. Les princes spoliés d’Allemaigne demandoint aussy que le roy se voulut joindre a eux avesques les rois de Suede et de Dannemarc[1] desquels ils estoint desja asseurés pour leur restablissement : et les Hollandois finalement sollicitoint le roy de prendre sa bonne part en la conqueste des Païs Bas, quy seroit infaillible s’il se vouloit joindre avesques tant d’autres forces ennemies de l’Espagnol. Le roy n’en avoit que trop de sujet et avoit bonne volonté de mener les mains : mais il consideroit qu’il mettoit le feu par toute la chrestienté en ce faisant, et se resolut seulement d’entreprendre avesques la ligue d’Italie la restitution de la Valteline, et le duché de Milan sy on luy resistoit.
A cet effet il avoit envoyé une armée sous monsieur le connestable en Italie, et avesques quelques trouppes françaises et suisses qu’il fit passer aux Grisons sous la charge du marquis de Cœuvres, son ambassadeur extreordinaire en Suisse[2], il assista les Grisons au
