porter Mr le Prince hors d’icy, je me suis voulu fier en vous de sa conduitte. Voyla Mr le mareschal de Temines quy l’a pris et quy l’a gardé dans le Louvre avec peine : mais il seroit a craindre que sy je luy tenois plus longuement, l’on ne fit quelque entreprise pour le sauver, ce quy se pourroit faire aysement, et vous avés veu que tantost quand ces princes sont revenus de Soissons, il y avoit plus de deux cens gentilshommes quy estoint avec eux, ou pour l’amour d’eux dans le Louvre : joint aussy que cela empesche que le roy et moy n’osons quasy en sortir, et sy nous voulions aller a Saint Germain ou ailleurs, il ne seroit icy en seureté. C’est pourquoy je le veux mettre a la Bastille et veux que vous m’en respondiés par les chemins et que vous vous en chargiés : car monsieur le mareschal n’a autre chose que ce quy sera dans son carrosse. Nous le ferons passer par la grande galerie dans les Tuilleries, et de la avec les Suisses du faubourg Saint Honoré et les Suisses et François quy sont derriere et devant le Louvre, vous le menerés par hors de la ville dans la fausse porte de la Bastille, ce que je crois que vous pourrés faire seurement. »
Elle me dit en suitte que le roy vouloit tant faire pour moy que li honori, li bieni, li carichi, (ce sont ses mots), ne me manqueroint point.
Je luy respondis que l’honneur de sa confiance m’estoit suffisante recompense du petit service qu’elle desiroit de moy, lequel j’executerois fort fidellement a peine de ma vie, mais que sy j’osois luy conseiller de faire passer Mr le Prince a travers de la ville, je luy respondois de le conduire a la Bastille en toute seureté ; qu’il n’y avoit rien a craindre ; que rien ne se
