famille, luy sont sy considerables qu’elle est resolue de marier madame sa fille a un prince de son sang, quy est un refus absolu, et lequel, bien que je me fusse resolu de ne donner point mon avis sur le choix des conseils divers que je luy avois proposés, neammoins j’estois trop son serviteur pour ne luy pas dire que je ne luy conseille pas d’user de termes sy crus, attendu que nier a quy peut forcer, est l’art de se ruiner : joint aussy que, faisant cette response, vous ferés infailliblement une autre action quy sera encores pire, quy est que, sy les affaires d’Allemaigne appellent la personne et l’armée du roy, ou sur vostre frontiere, ou par vostre païs pour le passage, vous estes comme obligé, par ce precedent refus, d’envoyer mesdames vos filles en Bavieres pour en eslongner la proye ; et, estant en Bavieres, quy sait sy Mr le duc de Bavieres n’aymera pas autant cette riche héritiere pour un de ses neveux que pour celuy de sa femme ? »
« La seconde response que vous pouvés faire au roy, est de luy dire que monsieur le dauphin ny madame vostre fille n’estant point en eage nubile, vous n’y voulés point inutilement penser avant le temps de le pouvoir conclure. Cette seconde response est un refus absolu, et quy sera receu du roy pour tel : mais Vostre Altesse pourroit adjouster, pour l’adoucir, que vous asseurés neammoins Sa Majesté que, lors que cela sera, vous n’entendrés a aucune proposition que l’on vous veuille faire sur ce sujet, sans sçavoir premierement sy Sa Majesté continue au dessein de luy faire l’honneur de songer a son alliance pour monsieur le dauphin ; y adjoustant encores (sy vous vou-
