mon pouvoir dans le cueur seulement. Ce chagrin me despesche à mourir, tant et tant, que vous serez tost libre !… Attendez mon décez de ce monde. C’est la seule requeste que vous fasse celluy qui est vostre maistre et qui pourroyt commander, mais qui ne veult estre que vostre premier ministre et serviteur. Ne trahissez pas l’honneur de mes cheveulx blancs !… Dans ceste occurrence, il y ha des seigneurs qui ont occis leurs femmes…
— Las ! vous me tuerez doncques ? dit-elle.
— Non, reprint le vieulx homme, ie t’ayme trop, mignonne. Va, tu es la fleur de ma vieillesse, la ioye de mon ame ! Tu es ma fille bien aymée. Ta veue resconforte ma veue ; et de toy, ie puis tout endurer, feust-ce ung chagrin, comme ung bonheur… Ie te donne pleine licence de tout, pourveu que tu ne maulgrées pas trop le paouvre Bruyn qui t’ha faicte grant dame, riche et honorée. Ne seras-tu point une belle veufve ? Va, ton heur adoucira mon tre-pas…
Et il treuva dans ses yeulx desseichez encore une larme, qui coula toute chaulde sur son tainct de pomme de pin, et cheut sur la main de Blanche, laquelle, attendrie de veoir ce grant amour de ce vieil espoux qui soy mettoyt en fosse pour luy plaire, dit en riant : — Là ! là ! ne plourez point, i’attendray…
Là dessus, le senneschal luy baisa les mains, et la resgalla de petites pigeonneries, en disant d’une voix esmue : — Si tu sçavoys, Blanche, ma mye, comme en ton sommeil ie te mangeoys de caresses, ores cy, ores là !… Et le vieulx cinge la flattoyt de ses deux mains, qui estoyent de vrais ossuaires… — Et, disoyt-il tousiours, ie n’osoys resveigler ce chat qui eust estranglé mon honneur, veu qu’à ce mestier d’amour ie n’embrasoys que mon cueur.
— Ah ! reprint-elle, vous pouvez me dodiner ainsy, mesmes quand i’ay les yeulx ouverts, cela ne me faict rien.
Sur ce dire, le paouvre senneschal, prenant le petit poignard qui estoyt sur la table de lict, le luy bailla, disant avecques raige :
— Ma mye, tue-moy, ou laisse-moy cuyder que tu m’aymes ung petit !
— Oui ! oui ! feit-elle tout effrayée, ie verrai à vous aymer beaucoup.
Voilà comment ce ieune pucelaige s’empara de ce vieillard et l’asservit, pour ce que, au nom de ce ioly champ de Vénus, qui estoyt en frische, Blanche faisoyt, par la malice naturelle aux
