par les rues, monsieur de Raguse se print à rire et à vouloir gausser.
— Ah ! ma mignonne, suis-je pas digne d’estre pape, et mieulx que cela, ton guallant ce soir ?…
Mais, voyant Impéria soulcieuse, il s’approucha d’elle pour la mignardement enlasser dans ses bras et la mignotter à la fasson des cardinaulx, gens brimballant mieulx que tous aultres, voire mesme que les souldards, en ce qu’ils sont oisifs et ne guastent point leurs esperits essentiels.
— Ha ! ha ! feit-elle en reculant, tu veulx ma mort… fou métropolitain… Le principal pour vous est de vous gaudir, meschant ruffian, et mon ioly cas, chouse accessoire. Que ta ioye me tue, vous me canoniserez, est-ce pas ?… Ah ! vous avez la coqueluche, et me voulez !… Tourne et vire ailleurs, moyne despourveu de cervelle… Et ne me touche aulcunement, feit-elle en le voyant s’advancer, sinon ie te gourmande avecques ce poignard !
Et la fine commère tira de son aumosnière un tout ioly petit stylet, dont elle sçavoyt iouer à merveille dans les cas opportuns.
— Mais, mon petit paradiz, ma mignonne, dit l’aultre en riant, vois-tu pas la ruse ?… Ne falloyt-il pas forbannir ce vieulx bœuf de Coire ?…
— Oui da… si vous m’aymez, bien le verray-je, reprint-elle… ie veulx incontinent que vous sortiez… Si vous estes happé par la maladie, ma mort vous chaille peu. Ie vous cognoys assez pour sçavoir à quel denier vous mettriez ung instant de ioye, à l’heure de vostre trespassement. Vous noyeriez la terre. Ah ! ah ! vous vous en estes iacté estant yvre. Ores, ie n’aime que moy, mes threzors et ma santé… Allez, si vous n’avez pas la fressure gelée par le trousse-galant, vous me reviendrez veoir demain.. Auiourd’huy, ie te hais, mon bon cardinal ! dit-elle en soubriant.
— Impéria, s’escria le cardinal à genoilz, ma saincte Impéria allons, ne te ioue pas de moi ?
— Non ! feit-elle, ie ne ioue jamais avecques les chouses sainctes et sacrées.
— Ah ! vilaine ribaude, ie t’excommunieray… Demain !…
— Mercy Dieu ! vous voilà hors de vostre sens cardinalesque.
— Impéria ! satanée fille du diable ! Hé ! là ! là ! ma toute belle !… ma petite…
— Vous perdez le respect !… Ne vous agenoillez pas. Fy doncques !…
