Philippe, atteint d’une raige qui luy fermoyt le bec, en ce qu’il voyoyt son heur s’en aller en fumée, donnoyt l’évesque à plus de diables qu’il n’y avoyt de moines en vie. Ils estoyent pieçà vers la moitié du repas, que le ieune prebstre n’y avoyt point encores touchié, n’ayant faim que d’Impéria, près de laquelle il se pelotonnoyt sans mot dire, mais parlant de ce bon languaige auquel les dames entendent, sans poincts, virgules, accens, lettres, figures ni charactères, notes ou imaiges. Le gros évesque assez sensuel et soigneux du vestement de peau ecclésiastique dans lequel sa deffuncte mère l’avoyt cousu, se laissoyt amplement servir de l’hypocras par la main délicate de Madame ; et il en estoyt desià à son premier hocquet, quand ung grand bruit de cavalcade feit esclandre dans la rue. Le numbre des chevaulx, les Ho ! ho ! des paiges, démonstrèrent qu’il arrivoyt quelque prince furieux d’amour. Et de faict, tost après, le cardinal de Raguse, à qui les gens d’Impéria n’avoyent osé barrer la porte, entra dans la salle. A ceste
veue triste, la paouvre courtizane et son petit devinrent honteux et
desconvenus comme des lépreux d’hier, car c’estoyt tenter le diable que vouloir évincer le cardinal, d’autant qu’alors on ne sçavoyt qui seroyt pape, les trois prétendans s’estant desmis du bonnet pour le prouffict de la chrestienté. Le cardinal, qui estoyt un rusé Italian, trez-barbu, grant sophisticqueur et boute-en-train du Concile, devina, par le plus foible iect de son entendement, l’alpha et l’oméga de ceste adventure. Il n’eut qu’ung petit pensier à peser pour sçavoir comment il debvoyt besongner à ceste fin de bien hypothecquer ses fressurades. Il arrivoyt poulsé par ung appétit de moyne ; et, pour obtenir sa repeue, il estoyt homme à daguer deux moines et vendre son morceau de vraye croix, ce qui eust esté mal.
