yeulx, et ne touchoyent point aux plats… Comme ils s’estoyent enfin establis dans leur aise et contentement, il se feit ung bruit désagréable à l’huys de Madame, comme si gens s’y battoyent en criant.
— Madame, dit la meschinette hastée, en vécy bien d’une aultre !…
— Quoy ? s’escria-t-elle d’ung air haultain, comme tyran maulgréant d’estre interrompu.
— L’évesque de Coire veut parler à vous…
— Que le diable l’estrille ! respondit-elle en resguardant Philippe de gentille fasson.
— Madame, il ha veu la lumière par les fissures et faict grand tapaige…
— Dis-lui que i’ay la fiebvre, et point ne mentiras, pour ce que ie suis malade de ce petit prebstre qui me frétille dans la cervelle.
Mais, comme elle achevoyt son dire, en pressant dévotieusement
la main de Philippe, qui bouilloyt dans sa peau, le gros évesque
de Coire se montra tout poussif de colère. Ses estaffiers le suivoyent portant une truite canonicquement saumonée, fresche tirée hors du Rhin, gizant dans un plat d’or ; puis des espices contenues ez drageoires mirificques, et milles friandises, comme liqueurs et compotes faites par de sainctes nonnes de ses abbayes.
— Ah ! ah ! fit-il de sa grosse voix, i’ai le temps d’être avecques le diable, sans que vous me fassiez escorchier par luy, ma mignonne.
— Vostre ventre fera quelque iour une belle guaisne d’espée… respondit-elle en fronssant ses sourcils, qui, de beaulx et plaisans, devinrent meschans à faire trembler.
— Et cet enfant de chœur, vient-il doncques à l’offrande desià ? dit insolemment l’évesque en tournant sa face large et rubiconde vers le gentil Philippe.
— Monseigneur, ie suis icy pour confesser Madame.
— Oh ! Oh ! sçays-tu pas les canons !… Confesser les dames à ceste heure de nuict est ung droict réservé aux évesques… Ores, tire les grègues, va pasturer avecques simples moynes, et ne retourne icy, soubz peine d’excommunication.
