plans délicieux, blancs et luysans, à travers mille boucles frizotantes. Elle avoyt sur son front de neige ung rubis-balay, moins fertile en vagues de feu que ses yeulx noirs humectez de larmes par son bon rire. Mesmes elle gecta son solier à la poulaine, doré comme une chaasse, en se tordant, force de ribauder, et feit veoir son pied nud, plus petit que bec de cygne. Ce soir, elle estoyt de belle humeur ; aultrement, elle auroyt faict bouter dehors par la fenestre le petit tonsuré, sans en prendre plus de soulcy que de son premier évesque.
— Il ha de beaulx yeulx, madame ! dit une des meschines.
— D’où sort-il doncques ? demanda l’aultre.
— Paouvre enfant ! s’escria Madame, sa mère le chercheroyt. Il faut le remettre dans la bonne voye.
Le Tourangeau, ne perdant pas le sens, feit ung signe de délectation, en mirant le lict de brocart d’or où alloyt reposer le ioly corps de la galloise. Ceste œillade, pleine de suc et d’intelligence amoureuse, reveigla la phantaisie de la dame, qui, moitié riant, moitié férue du mygnon, luy répéta : « Demain ! » et le renvoya par ung geste, auquel le pape Iehan luy-mesmes auroyt obéi, d’autant qu’il estoyt comme ung limasson sans cocque, veu que le Concile venoyt de le dépapiser.
— Ah ! madame, voilà encores ung vœu de chasteté mué en dezir d’amour, dit l’une des femelles.
Et les risées recommencèrent dru comme gresle. Philippe s’en alla, donnant de la teste contre les bois, en vraye corneille coëffée, tout estourdy qu’il estoyt d’avoir entrevu ceste créature plus friande à croquer que syrène sortant de l’eaue… Il remarqua les figures d’animaulx engravées au-dessus de la porte, et s’en revint chez son bonhomme d’archevesque, avecques mille pannerées de diables dans le cueur, et la fressure toute sophisticquée. Monté dans sa chambrette, il y compta ses angelotz pendant toute la nuict, mais n’en treuva iamais que quatre ; et, comme ce estoyt tout son sainct-frusquin, il cuydoyt satisfaire la belle en luy donnant ce qu’il avoyt à luy dans le monde.
— Qu’avez-vous doncques, Philippe ? luy dit le bon archevesque, inquiet des tresmoussemens et des Oh ! oh !… de son clerc.
— Ah ! monseigneur ! respondit le paouvre prebstre, ie m’esbahis comment une femme si légiere et si doulce poise tant sur le cueur !…
— Et quelle ? reprint l’archevesque en posant son bréviaire, qu’il lisoyt pour les aultres, le bonhomme.
