à ieu de quilles, pour la deschargier sur le front pasle dudict René, lequel, saichant qu’il estoyt bien en faulte à l’endroyt de son seigneur, demoura serain et tendit le col, en songeant qu’il alloyt solder toute la coulpe pour sa mye en ce monde et dans l’autre.
Mais si belle ieunesse et toutes les séductions naturelles de ce ioly crime trouvèrent graace au tribunal du cueur chez ce vieil homme, encores que Bruyn feust sévère ; et lors, jectant sa masse au loing sur ung chien qu’il escharbotta : — Que mille millions de griphes mordent pendant l’éternité toutes les charnières de celle qui ha faict celuy qui sema le chesne dont feust construite la chaire sur laquelle tu m’as cornifié ! Et autant à ceulx qui t'engendrèrent, mauldict paige de malheur ! Va-t-en au diable d’où tu viens ! Sors de devant moi, du chastel, du pays, et n’y reste un poulce de temps plus que besoing est ; sinon, ie sçauray te préparer une mort à petit feu qui te fera mauldire, vingt foys par heure, ta vilaine ribaude…
En entendant ce commencement des paroles du senneschal qui avoyt ung retour de ieunesse sur les iurements, le paige s’enfuyt en le quittant du reste, et feit bien. Bruyn, tout flambant de maleraige, gaigna les iardins à grant renfort de pieds, maulgréant tout sur son passage, frappant, iurant ; mesmes qu’il renversa trois poteries tenues par ung sien serviteur qui portoyt la pastée aux chiens ; et il se cognoissoyt si peu qu’il auroyt tué ung peigne pour ung mercier. Brief, il aperceut sa despucelée, qui resguardoyt sur la route du moustier, attendant le paige, et ne saichant point que plus iamais ne le verroyt.
— Ha ! madame, par la rouge triple fourche du diable, suis-je ung mangeur de bourdes et ung enfant, pour croire que vous avez si grant pertuys qu’ung paige y entre sans vous esveigler ? Par la mort ! par la teste ! par le sang !
— Vère, respondit-elle, voyant que la mine estoyt esventée, ie l’ay bien gracieusement senty ; mais comme vous ne m’aviez point appris la chouse, i’ay cru resver !
La grant ire du senneschal fondit comme neige au soleil ; car la plus grosse cholère de Dieu luy-mesme se feust esvanouie à ung sourire de Blanche.
— Que mille millions de diables emportent cet enfant forain ! Ie iure que…
— La, la - ne iurez point, feit-elle. S’il n’est vostre, il est mien :
