Peir-Narien rente dans niaze.
Niaze là ti arranzé cornent éne vrai lacaze. léna laçambes, iéna colidors, iéna lescaliers, assembe laportes, assembe lafenètes ; mais tout ça napas faite av dibois cornent lacaze qui làhaut laterre : tout quiqueçose taillé dans niaze même, coma dire dans coton fin fin cornent éne lafimée. Peir-Narien blizé tone.
Peir-Narien rente dans vestibile : napas personne. Lescalier divant li, li monté. Arrive làhaut li trouve éne longue longue colidor av éne bande laçambes ; mais zaute tout laporte frémé. A cote Colle-des-Keirs ? Peir-Narien colle zoréye dans éne laporte ; li coûté, li coûté : narien. Li aile. Li colle zoréye dans éne laute laporte : narien. Li arrive dans troisième laporte : avlà li tende coma dire quiquéne après ronflé. Ça ti laçambe loulou. Son gros nénez boucé av larhime : li blizé dourmi laguéle ouvert. Quand doumounde faire zaute lacase dans milié niaze, touzours bisoin larhime av zaute : dimande zense Cirepipe.
Peir-Narien quitte la porte loulou ; li aile doucement doucement ; li arrive dans laporte éne, laçambe à cote li tende coment dire doumounde après plaingné. « Bien sîr, là même, ça ! » Li ouvert laporte av so labec, li rentré : ça ti laçambe Colle-des-Keirs.
