A la Croiz vint, ou cil l’atent,
Dist li qu’il aut isnelement
Et qu’il le meint la droite voie.
El bois entrent, qui mot onbroie.
Devant le roi se met l’espie ;
Li rois le sieut, qui bien se fie
En l’espee que il a çainte,
Dont a doné colee mainte.
Si fait il trop que sorquidez ;
Quar, se Tristran fust esvelliez,
Li niés o l’oncle se meslast,
Li uns morust, ainz ne finast.
Au forestier dist li roi Mars
Qu’il li dorroit d’argent vint mars,
Sel menoit tost a lor recet.
Li forestier (qui vergonde ait !)
Dist que pres sont de lor besoigne.
Du buen cheval, né de Gascoingne,
Fait l’espie le roi decendre,
De l’autre part cort l’estrier prendre ;
A la branche d’un vert pomier
La reigne liënt du destrier.
Poi vont avant, quant ont veü
La loge por qu’il sont meü.
Li rois deslace son mantel,
Dont a fin or sont li tasel :
Desfublez fu, mot out gent cors.
Du fuerre trait l’espee fors,
Iriez s’atorne, sovent dit
Q’or veut morir s’il nes ocit.
L’espee nue an la loge entre.
Le forestier entre soventre,
Grant erre après le roi acort :
Page:Béroul - Le Roman de Tristan, par Ernest Muret, 1922.djvu/81
Cette page a été validée par deux contributeurs.
