Tristran est en la chanbre entrez.
« Niés, » fait li rois, « avant venez.
Ton mautalent quite a Brengain
Et je te pardorrai le mien.
— Oncle, chiers sire, or m’entendez :
Legirement vos desfendez
Vers moi, qui ce m’avez mis sure
Dont li mien cor el ventre pleure,
Si grant desroi, tel felonie !
Dannez seroie et el honie.
Ainz nu pensames, Dex le set.
Or savez bien que cil vos het
Qui te fait croire tel mervelle.
D’or en avant meux te conselle,
Ne portë ire a la roïne
N’a moi, qui sui de vostre orine.
— Non ferai je, beaus niés, par foi. »
Acordez est Tristran au roi.
Li rois li a doné congié
D’estre a la chanbre : es le vus lié.
Tristran vait a la chanbre et vient,
Nule cure li rois n’en tient.
Ha ! Dex, qui puet amor tenir
Un an ou deus sanz descovrir ?
Car amors ne se puet celer :
Sovent cline l’un vers son per,
Sovent vienent a parlement,
Et a celé et voiant gent.
Par tot ne puënt aise atendre,
Maint parlement lor estuet prendre.
A la cort avoit trois barons,
Page:Béroul - Le Roman de Tristan, par Ernest Muret, 1922.djvu/38
Cette page a été validée par deux contributeurs.
