Page:Auvray - Le Banquet des Muses, 1865.djvu/89

Mais tost apres ceste friande
Songeant à si douce viande
Ressentoit un chatoüillement,
Et d’une abscence si soudaine
Ne voulut prendre qu’à grand peine
Des Excuses en payement.

Un jour donc ce tendron vollage
Laisse entrer le chat au formage,
Mais non pas si secrettement
Que la chose ne fut cognuë,
Mais le jean prit à sa venuë
Des Excuses en payement.

Or il faut qu’en passant je touche
Un dont la femme fut en couche
Au bout des huict mois seulement.
D’un enfant vivant et viable,
Mais le sot print pour un semblable
Des Excuses en payement.

Puis il disoit, non, c’est folie,
Huict mois sont un terme sans vie,
Pour le sçavoir plus seurement
J’en veux le medecin entendre.
C’est à faire aux cocus à prendre
Des Excuses en payement.

Le medecin de Happelourde
Qui fut adverty de la bourde,
À ce bon Jean dit gayement :
Mon amy, sçache que ta femme
Ne t’a point baillé par diffame
Des Excuses en payement.