On dit que j’ay bien manière
D’estre orguillousette ;
Bien affiert à estre fiere
Jeune pucelette.
RONDEL.
Reviens, amy ; trop longue est ta demeure :
Elle me fait avoir peine et doulour.
Mon esperit te demande à toute heure.
Reviens, ami ; trop longue est ta demeure.
Car il n’est nul, fors toi, qui me sequeure,
Ne secourra, jusques à ton retour.
Reviens, ami ; trop longue est ta demeure :
Elle me fait avoir peine et doulour.
|
RONDEL.
On doit le temps ainsi prendre qu’il vient
Tout dit que pas ne dure la fortune.
Un temps se part, et puis l’autre revient :
On doit le temps ainsi prendre qu’il vient.
Je me conforte en ce qu’il me souvient
Que tous les mois avons nouvelle lune :
On doit le temps ainsi prendre qu’il vient
Tout dit que pas ne dure la fortune.
|
