Bien preuoyans la paix que leur amene
Le beau Dauphin, tant deſiré en France.
Monſtres marins veit on lors aſſommer
Et conſommer tempeſtes deuallées :
Si que les nefs ſans crainte d’abymer
Nageoient en mer à voiles auallées.
Les grans poiſſons faiſoient ſaulz & halées,
Et les petits d’vne voix fort ſereine
Doucettement auecque la Sereine
Chantaient au iour de ſa noble naiſſance,
Bien ſoit venu en la mer ſouueraine
Le beau Dauphin tant deſiré en France.
Prince marin, fuyant œuure vilaine
Ie te ſupply, garde que la Baleine,
Au Celerin plus ne face nuiſance,
Afin qu’on aime en ceſte mer mondaine
Le beau Dauphin, tant deſiré en France.
Tu trouueras d’autres Balades à double refrain, l’vn repeté au mylieu du couplet, & l’autre à la fin : comme en la Balade de Marot à Frere Lubin : & ceſte manière de refrain double, eſt autant rare que plaiſante. La Balade au demourant ſe fait de vers de huit & dix ſyllabes mieux & plus communément. Mais tiens touſiours en memoire ceſte regle generalle, que le vers de huit ſyllabes eſt lié ſeulement pour les choſes legeres & plaiſantes. Note conſéquemment quant au fait de la Balade, que ſa première vertu & perfection eſt, quand
