Tholomée par traïſon dampnée :
Toudis avient ce qu’il doit avenir.
Depuis que le diluge fu
Et que les cinq citez fondirent
Par leur pechié, par ardent fu,
Que Loth & ſa femme en yſſirent ;
Ne puis que les prophetes dirent
Les maulx dont ly mons ſervit plains,
Près de la fin li noms Dieu vains,
Et ſa loy eſcandaliſée,
Ne fut li termes ſi prochains
D’eſtre monarchie muée.
Balade équivoque, rétrograde à léonine.
Et ſont les plus fors Balades qui ſe puiſſent faire car il convient que la dernière ſillabe de chaſcun ver ſoit reprinſe au commencement du vers enſuivent, en autre ſignification & en autre ſens que la fin du vers précèdent ; & pour ce ſont telz mos appellez équivoques & rétrogrades ; car en une meiſme ſemblance de parler & d’eſcripture, ilz hûchent & baillent ſignification & entendement contraire des mos derreniers mis en la rime, ſi comme il apparra en ceſte couple de Balade miſe cy apres.
Laſſe ! laſſe ! malencontreuſe & dolente,
Lente me voy, fors de ſouſpirs & plains.
