amatoriam criminatum, opera servitioque tàm necessario carere ; cùm alioquin, exectis genitalibus, possit neque in venerem nullo modo surgere, nosque omni metu periculi liberare, insuper etiam longè crassior atque corpulentior effici. Multos ego scio non modò asinos inertes, verùm etiam ferocissimos equos, nimio libidinis calore laborantes, atque ob id truces vesanosque, adhibita tali detestatione, mansuetos ac mansues exinde factos, et oneri ferendo non inhabiles, et cæteri ministerii patientes. Denique, nisi vobis suadeo nolentibus, possum, spatio modico interjecto, quo mercatum proximum obire statui, petitis è domo ferramentis, huic curæ præparatis, ad vos actutùm redire, trucemque amatorem istum atque insuavem dissitis femoribus emasculare, et quovis vervece mitiorem efficere.
Tali sententia mediis Orci manibus extractus, sed extremæ pœnæ reservatus, mœrebam, et in novissimâ parte corporis totum me periturum deflebam, inedia denique continua, vel præcipiti ruina memet ipse quærebam extinguere : moriturus quidem nihilominus, sed moriturus integer. Dumque in ista necis meæ decontor electione ; matutinò me rursum puer ille,
