Ad istum modum vaticinatus sacerdos egregius, fatigatos anhelitus trahens, conticuit. Exindè permixtus agmini religioso procedens, comitabar sacrarium : totæ civitati notus ac conspicuus, digitis hominum nutibusque notabilis. Omnes in me populi fabulantur : Hunc omnipotentis hodie Deæ numen augustum reformavit ad homines. Felix hercules, et ter beatus ! qui vitæ scilicèt præcedentis innocentia fideque meruerit tàm præclarum de cœlo patrocinium ; ut renatus quodammodo, statim sacrorum obsequio desponderetur.
Inter hæc, et festorum votorum tumultum, paulatim progressi, jàm ripam maris proximamus ; atque ad ipsum illum locum, quo pridie meus stabulaverat asinus, pervenimus. Ibidem simulacris ritè dispositis, navem faberrimè factam, picturis miris Ægyptiorum circumsecus variegatam, summus sacerdos teda lucida, et ovo et sulphure, solemnissimas preces de casto præfatus
