Nec ille deerat, qui magistratum fascibus purpuraque luderet ; nec qui pallio, baculoque, et baxeis, et hircino barbitio philosophum fingeret ; nec qui, diversis harundinibus, alter aucupem cum visco, alter piscatorem cum hamo induceret. Vidi et ursam mansuem, quæ, cultu matronali, sella vehebatur ; et simiam pileo textili, crocotisque Phrygiis, catamiti pastoris specie, aureum gestantem poculum ; et asinum pinis adglutinatis adambulantem cuidam seni debili ; ut illum quidem Bellerophontem, hunc autem diceres Pegasum ; tamen rideres utrumque.
Inter has oblectationes ludicras, popularium, quæ passim vagabantur, jàm sospitatricis Deæ peculiaris pompa moliebatur. Mulieres candido splendentes amicimine, vario lætantes gestamine, verno florentes coronamine, quæ de gremio per viam, qua sacer incedebat comitatus, solum sternebant flosculis : aliæque nitentibus speculis pone
