visum est. Ejus mirandam speciem ad vos etiam referre connitar, si tamen mihi disserendi tribuerit facultatem paupertas oris humani : vel ipsum numen ejus dapsilem copiam eloquutilis facundiæ subministraverit.
Jàm primùm crines uberrimi prolixique, et sensim intorti, per divina colla passivè dispersi, molliter defluebant. Corona multiformis, variis floribus sublimem distrinxerat verticem ; cujus media quidem super fronte plana rotunditas, in modum speculi, vel immò argumentum lunæ, candidum lumen emicabat. Dextra lævaque sulcis insurgentium viperarum cohibita, spicis etiam Cerealibus desuper porrectis. Multicolor, bysso tenui pertexta : nunc albo candore lucida, nunc croceo flore lutea ; nunc roseo rubore flammida, et, quæ longè longèque etiam meum confutabat obtutum, palla nigerrima, splendescens atro nitore ; quæ circumcirca remeans, et sub dextrum latus ad humerum lævum recurrens, umbonis vice, dejecta parte laciniæ, multiplici contabulatione dependula, ad ultimas oras nodulis fimbriarum decoriter confluctuabat. Per intextam extremitatem, et in ipsa oræ planitie, stellæ dispersæ coruscabant : earumque media
