Page:Apulée - Les Métamorphoses, Bastien, 1787, II.djvu/356

canus et opilio, lucro libidinis vendiderit, cum totius etiam suæ stirpis exitio ? Sic hercules et aliud sequens judicium, inter inclytos Achivorum duces celebratum : vel cum falsis insimulationibus, eruditione doctrinaque præpollens Palamedes proditionis damnatur : vel virtute Martia præpotenti præfertur Ulysses Mendicus Ajaci maximo. Quale autem et illud judicium apud legiferos Athenienses, et catos illos, et omnis scientiæ magistros ? Nonne divinæ prudentiæ senex, quem sapientia prætulit cunctis mortalibus deus Delphicus, fraude et invidia nequissimæ factionis circumventus, velut corruptor adulescentiæ, quam frenis coërcebat, herbæ pestilentis succo noxio peremptus est, relinquens civibus ignominiæ perpetuæ maculam ? cùm nunc etiam egregii Philosophi sectam ejus sanctissimam præoptent, et summo beatitudinis studio jurent in ipsius nomen. Sed ne quis indignationis meæ reprehendat impetum, secum sic reputans : Ecce nunc patiemur philosophantem nobis asinum ? rursùs, undè discessi, revertar ad fabulam.