decoris addixisset ; sese regnum totius Asiæ tributuram.
At illam, quam cultus armorum Minervam fecerat, duo pueri muniebant, præliaris deæ comites armigeri, terror et metus nudis insultantes gladiis, at ponè tergum tibicen hormum canebat bellicosum : et permiscens bombis gravibus tinnitus acutos, in modum tubæ, saltationis agilis vigorem suscitabat. Hæc inquieto capite, et oculis in aspectu minacibus, citato et intorto genere, gesticulatione alacri demonstrabat Paridi, si sibi formæ victoriam tradidisset ; fortem, tropæisque bellorum inclytum suis adminiculis futurum.
Venus ecce cum magno favore caveæ, in ipso meditullio scenæ, circumfuso populo lætissimorum parvulorum, dulce subridens, constitit amœnè. Illos teretes et lacteos puellos diceres tu Cupidines et Cupidines veros, de cœlo vel mari commodùm involasse, nàm et pinnulis et sagittulis, et habitu cætero formæ præclarè congruebant : et, velut nuptiales epulas obituræ dominæ coruscis prælucebant facibus. Et influunt innuptarum puellarum decoræ soboles, hinc Gratiæ gratissimæ ; inde Horæ pulcherrimæ, quæ jaculis floris serti et soluti Deam
