et domus et aures præsidis patefierent. Jàmque ab ipso exordio, crudelissimæ mulieris cunctis atrocitatibus diligenter expositis, repente mentis nubilo turbine correpta semihiantes adhuc compressit labias : et attritu dentium longo stridore reddito, antè ipsos præsidis pedes exanimis corruit.
Nec ille, vir alioquin exercitus, multiforme facinus execratræ veneficæ dilatione languida passus marcescere, confestim cubiculariis mulieris attractis vi tormentorum, veritatem eruit : atque illam, minùs quidem quàm merebatur, sed quòd dignus cruciatus alius excogitari non poterat, certè bestiis objiciendam pronuntiavit.
Talis mulieris publicitus matrimonium confarreaturus, ingentique angore oppidò suspensus, exspectabam diem muneris : sæpiùs quidem mortem mihi mea volens manu consciscere, priusquàm scelerosæ mulieris contagio macularer, vel infamia
