quàm sine ullo compendio indignationem vestram exercueritis. Quin ego censeo, deducendam eam ad quampiam civitatem, ibique venundandam, nec enim levi pretio distrahi poterit talis ætatula. Nàm et ipse quosdam lenones pridem cognitos habeo, quorum poterit unus magnis equidem talentis, ut arbitror, puellam istam præstinare, condignè natalibus suis in fornicem processuram, nec in similem fugam discursuram : nonnihil etiam, cùm lupanari servierit, vindictæ vobis depensuram. Hanc et animo quidem meo sententiam conducibilem protuli, sed vos nostrorum estis consiliorum rerumque domini. Sic ille latronum fisci advocatus nostram causam pertulerat, virginis et asini sospitator egregius.
Sed in diutina deliberatione cæteri, cruciantes mora consilii mea præcordia, immò miserum spiritum, libenter tandem novitii latronis accedunt sententiæ : et protinus à vinculis exolvunt virginem. Quæ quidem,
