erat adhuc feralibus amiculis obstrictus atque obditus, portatur ad judicium puer. Jàmque liquidò servi nequissimi, atque mulieris nequioris patefactis sceleribus, procedit in medium nuda veritas, et novercæ quidem perpetuum indicitur exilium ; servus verò patibulo suffigitur : et omnium consensu, bono medico sinuntur aurei, opportuni somni pretium. Et illius quidem senis famosa atque fabulosa fortuna, providentiæ divinæ condignum accepit exitum : qui momento modico, immo puncto exiguo, post orbitatis periculum, adolescentium duorum pater repentè factus est.
At ego tunc temporis talibus fatorum fluctibus volutabar. Miles ille, qui me nullo vendente comparaverat, et sine pretio suum fecerat, tribuni sui præcepto debitum sustinens obsequium, litteras ad magnum scriptas principem Romam versus perlaturus, vicinis me quibusdam duobus servis fratribus undecim denariis vendidit. His erat dives admodùm dominus, at illorum alter pistor dulciarius, qui panes et mellita concinnabat edulia : alter coquus, qui sapidissimis intrimentis succuum pulmenta condita, vapore mollibat. Unico illi contubernio communem vitam sustinebant, meque ad vasa illa complura gestanda
