mulier, ficta qualibet causa confestim marito miris persuadet artibus, ad longissimè dissitas festinare villulas. Quo facto, maturatæ spei vesaniâ præceps, promissæ libidinis flagitat vadimonium. Sed juvenis modò istud, modò illud causæ faciens, execrabilem frustratur ejus aspectum : quoad illa nuntiorum varietate, pollicitationem sibi denegatam manifestò perspiciens, mobilitate lubrica nefarium amorem ad longè deterius transtulit odium. Et assumpto statim nequissimo, et ad omne facinus emancipato, quodam dotali servulo, perfidiæ suæ consilia communicat : nec quidquam meliùs videtur, quàm vitâ miserum privare juvenem.
Ergò missus continuò furcifer, venenum præsentaneum comparat : idque vino diligenter dilutum, insontis privigni præparat : exitio. Ac dùm de oblationis opportunitate secum noxii deliberant homines : forte fortuna puer ille junior, proprius pessimæ feminæ filius, post matutinum laborem studiorum domum se recipiens, prandio
