multitudinem, magnasque illas opes exiguo temporis amisi spatio. Nàm procuratorem principis ducenaria perfunctum, dehinc fortuna tristiore decussum, prætereuntem orato fueram aggressus. Sed rei noscendæ carpo ordinem.
Fuit quidam multis officiis in aula Cæsaris clarus atque conspicuus, ipse etiam probè spectatus. Hunc insimulatum quorundam astu, projecit extorrem sæviens invidia. Sed uxor ejus Plotina, quædam raræ fidei atque singularis pudicitiæ femina, quæ decimo partus stipendio viri familiam fundaverat, spretis atque contemptis urbicæ luxuriæ deliciis, fugientis comes, et infortunii socia, tonso capillo, in masculinam faciem reformato habitu, pretiosissimis monilium et auro monetali zonis refertis incincta, inter ipsas custodientium militum manus, et gladios nudos intrepida, cunctorum periculorum particeps, et pro mariti salute pervigilem curam sustinens, ærumnas assiduas ingenio masculo sustinebat.
