semiamicta, nudis et intectis pedibus, lutore buxeo macieque fœdata, et discerptæ comæ semicanæ, sordentes inspersu cineris, pleramque ejus anteventulæ contegebant faciem.
Hæc talis, manu pistori clementer injecta, quasi quippiam secretò collocutura, in suum cubiculum deducit eum : et adducta fore, quàm diutissimè demoratur. Sed cùm esset jàm confectum omne frumentum, quod inter manus opifices tractaverant, necessarioque peti deberet aliud, servuli cubiculum propter astantes dominum vocabant, operique supplementum postulabant. Atque ut illis sæpiculè et intervocaliter clamantibus nullus respondit dominus ; jàm forem pulsare validius : et quòd diligentissimè fuerat oppessulata, majus pejusque aliquid opinantes, nisu valido reducto vel diffracto cardine, tandem patefaciunt aditum. Nec uspiam reperta illa muliere, vident è quodam tigillo constrictum, jàmque exanimem pendere dominum. Eumque nodo cervicis absolutum, detractumque, summis plangoribus, summisque lamentationibus atque ultimo lavacro procurant : peractisque feralibus officiis, frequentique prosequente comitatu, tradunt sepulturæ.
