Page:Apulée - Les Métamorphoses, Bastien, 1787, II.djvu/22

et illum, qui jàm comprobatus videretur, ascisci, et alios ad supplendum numerum, vestigare statuunt. Tunc profectus, et paululùm commoratus ille, perducit immanem quemdàm juvenem, uti fuerat pollicitus, nescio an ulli præsentium comparandum, nàm, præter cæteram corporis molem, toto vertice cunctos antepollebat, et ei commodùm lanugo malis inserpebat : sed planè centunculis disparibus et malè consarcinatis semiamictum : inter quos pectus et venter crustata crassitie reluctabant. Sic introgressus : Avete, inquit, fortissimo deo Marti clientes, mihique jàm fidi commilitones ; et virum magnanimæ vivacitatis volentem volentes accipite, libentiùs vulnera corpore excipientem, quàm aurum manu suscipientem : ipsâque morte, quam formidant alii, meliorem. Nec me putetis egenum, vel abjectum, neve de pannulis istis virtutes meas æstimetis. Nàm præfui validissimæ manui, totamque prorsus devastavi Macedoniam. Ego sum prædo famosus, Hæmus ille Thracius, cujus totæ provinciæ nomen horrescunt : patre Therone atque latrone inclyto prognatus, humanò sanguine nutritus, interque ipsos manipulos factionis educatus, hæres et æmulus virtutis paternæ. Sed omnem pristinam sociorum fortium