bus detractos, ut ajebat, pro suâ frugalitate communi conferebat arcæ : infit etiam de salute commilitonum sollicitè sciscitari. Cognitòque quosdam, immò verò fortissimum quemque variis quidem, sed impigris casibus adoppetisse ; suadet tantisper pacatis itineribus omniumque præliorum servatis induciis, inquisitionibus commilitonum potius insisteretur, et tirocinio novæ juventutis, ad pristinæ manus numerum, Martiæ cohortis facies integraretur. Nam et invitos terrore compelli, et volentes præmio provocari posse : nec paucos humili servilique vitæ renuntiantes, instar tyrannicæ potestatis, sectam suam conferre malle. Se quoque jàm dudùm, pro suâ parte, quemdam convenisse hominem et statura procerum, et ætate juvenem, et corpore vastum, et manu strenuum : eique suasisse, ac denique persuasisse, ut manus hebetatas diutina pigritia, tandem referret ad frugem meliorem ; bonoque secundæ, dùm posset, frueretur valetudinis : nec manum validam erogandæ stipi porrigeret, sed hauriendo potiùs exerceret auro.
Talibus dictis universi omnes assensere :
