sacerdotes, novum quæstus genus sic sibi comminiscuntur. Sorte unica casibus pluribus enotata, consulentes de rebus variis plurimos, ad hunc modum cavillantur. Sors hæc erat :
Ideò conjuncti terram proscindunt boves,
Ut in futurum læta germinent sata.
Tum si qui, matrimonium sorte captantes, interrogarent ; rem ipsam responderi ajebant : Jungendos connubio, et satis liberorum procreandis. Si possessiones præstinaturus quæreret ; meritò boves, ut et jugum, et arva sementis florentia, pronuntiari. Si quis de profectione sollicitus, divinum caperet auspicium : junctos jàm paratosque quadrupedum cunctorum mansuetissimos : et lucrum promitti de glebæ germine. Si prælium capessiturus, vel latronum factionem persecuturus, utiles nec ne processus sciscitaretur ; addictam victoriam forti præsagio contendebant : quippè cervices hostium jugo subacturi, et prædam de rapinis uberrimam fructuosamque capturi.
