L. APULEII,
MADAURENSIS PLATONICI,
METAMORPHOSEOS :
SIVE
LUSUS ASINI.
LIBER NONUS.
Sic ille nequissimus carnifex contrà me manus impias obarmabat. At ego, præcipitante consilium periculi tanti præsentia, nec exspectatâ diutinâ cogitatione, lanienam imminentem fuga vitare statui, protinusque vinculo, quo fueram deligatus, abrupto, cursu me proripio totis pedibus, ad tutelam salubrem crebris calcibus velitatus : illicoque me, raptim transcursa proxima porticu, triclinio, in quo dominus ædium sacrificales epulas cum sacerdotibus Deæ cœnitabat, incontanter immitto, nec pauca rerum apparatus cibarii, mensas etiam, impetu meo collido, atque disturbo. Qua rerum deformi strage paterfamilias commotus, ut importunum atque lascivum, me cuidam famulo curiosè traditum, certo aliquo loco
