Page:Apulée - Les Métamorphoses, Bastien, 1787, II.djvu/14

vobis, ut mandaveratis, omnia. Nec argumentis dubiis, sed rationibus probabilibus, congruo cunctæ multitudinis consensu, nescio qui Lucius auctor manifestus facinoris postulabatur : qui proximis diebus, fictis commendaticiis literis, Miloni sese, virum commentitus bonum, artius conciliaverat, ut etiam hospitio susceptus, inter familiares intimos haberetur : plusculisque ibidem diebus demoratus, falsis amoribus ancillæ Milonis animum inrepens, januæ claustra sedulò exploraverat, et ipsa membra, in quis omne patrimonium condi solebat, curiosè perpexerat. Nec exiguum scelerati monstrabatur indicium, quippè cum eâdem nocte, sub ipso flagitii momento, idem profugisset, nec exindè usquàm compareret ; nam et præsidium fugæ, quo velocius, frustratis insecutoribus, procul ac procul abderet sese, eidem facilè suppeditasse, æquum nàmque illum suum candidum, vectorem futurum, duxisse secum. Planè servum ejus ibidem in hospitio repertum, scelerum consiliorumque herilium futurum indicem, per magistratus in publicam custodiam receptum, et altero die tormentis vexatum pluribus, ac penè ad ultimam mortem excarnificatum, nihil quidquam rerum talium esse confessum, missos tamen in