Sed officiis inferialibus statim exactis, puella protinus festinat ad maritum suum demeare : cunctasque prorsus pertentat vias. Certe illam lenem, otiosamque, nec telis ullis indigentem, sed placidæ quieti consimilem, inedia denique misera, et incuria squalida, tenebris imis abscondita cum luce jàm transegerat. Sed Thrasyllus instantia pervicaci, partim per semetipsum, partim per cæteros familiares ac necessarios, ipsos denique puellæ parentes, extorquet tandem, jàm lurore et illuvie pænè collapsa membra lavacro, cibo denique confoveret.
At illa, parentum suorum alioquin reverens, invita quidem, verum religiosæ necessitati succumbens, vultu non quidem hilaro, verùm paulò sereniore obiens, ut videbatur, viventium munia, prorsus in pectore, immò verò penitus in medullis, luctu ac mœrore carpebat animum : et dies totos totasque noctes insumebat luctuoso desiderio : et imaginem defuncti, quam ad habitum dei Liberi formaverat, affixo ser-
