frontem verò crispatam, prius decoriter discriminabo, caudæque setas incuria congestas et horridas, cuncta diligentia perpolibo : bullisque te multis aureis inoculatum, veluti stellis sidereis relucentem, et gaudiis popularium pomparum ovantem, sinu serico progestans nucleos, edulia mitiora, te meum sospitatorem quotidie saginabo. Sed nec inter cibos delicatos, et otium profundum, vitæque totius beatitudinem, deerit tibi dignitas gloriosa. Nàm memoriam præsentis fortunæ meæ, divinæque Providentiæ, perpetuâ testatione signabo : et depictam in tabulâ fugæ præsentis imaginem meæ domûs atrio dedicabo. Visetur, et in fabulis audietur, doctorumque stilis rudis perpetuabitur historia : Asino vectore virgo regia fugiens captivitatem. Accedes antiquis et ipse miraculis. Credemus etiam exemplo tuo veritati, et Phryxum arieti supernatasse, et Arionem delphinum gubernasse, et Europam tauro supercubasse. Quod si verè Jupiter mugivit in bovem : potest in asino meo latêre aliquid, vel vultus hominis, vel facies Deorum.
Page:Apulée - Les Métamorphoses, Bastien, 1787, I.djvu/537
Le texte de cette page a été corrigé et est conforme au fac-similé.
