præsentis beneficii vicem per eam mihi repensare te debere.
Sic fatus, jubet Mercurium Deos omnes ad concionem convocare protinus, ac, si qui cœtu cœlestium defuisset, in pœnam decem millium nummorum conventum iri pronuntiare. Quo metu statim completo cœlesti theatro, pro sede sublimi sedens procerus Jupiter, sic enuntiat. Dei conscripti Musarum albo adolescentem istum, quod manibus meis alumnatus sit, profectò scitis omnes : cujus primæ juventutis caloratos impetus freno quodam coercendos existimavi. Sat est quotidianis eum fabulis, ob adulteria, cunctasque corruptelas infamatum ; tollenda est omnis occasio, et luxuria puerilis nuptialibus pedicis alliganda. Puellam elegit, et virginitate privavit : teneat, possideat, amplexus Psychem semper suis amoribus perfruatur. Et ad Venerem collatâ facie, ne tu, inquit, filia, quidquam contristare : nec prosapiæ tantæ tuæ, statuique de matrimonio mortali metuas. Jàm faxo nuptias non impares, sed legitimas, et jure civili congruas. Et illicò per Mercurium arripi Psychem, et in cœlum perduci jubet. Porrecto ambrosiæ
