sitate. Sed interim quidem tu provinciam, quæ tibi matris meæ præcepto mandata est, exequere gnaviter : cætera egomet videro. His dictis, amator levis in pinnas se dedit. Psyche verò confestim Veneri munus reportat Proserpinæ.
Intereà Cupido amore nimio peresus, et ægra facie matris suæ repentinam sobrietatem pertimescens, ad armile redit : alisque pernicibus cœli penetrato vertice, magno Jovi supplicat, suamque causam probat. Tunc Jupiter, prehensa Cupidinis buccula, manuque ad os suum relata, consaviat, atque sic ad illum : Licet tu, inquit, domine fili, numquam mihi concessu Deûm decretum servaris honorem ; sed istud pectus meum, quo leges elementorum et vices siderum disponuntur, convulneraris assiduis ictibus, crebrisque terrenæ libidinis fœdaveris casibus, contràque leges, et ipsam Juliam, disciplinamque publicam turpibus adulteriis existimationem famamque meam læseris, in serpentes, in ignes, in feras, in aves et gregalia pecua serenos vultus meos sordidè reformando ; attamen modestiæ meæ memor, quodque inter istas meas manus creveris, cuncta perficiam : dùm tamen scias, æmulos tuos cavere : ac, si qua nunc in terris puella præpollet pulchritudine,
