sed inde nullo pacto redire poteris. Mihi ausculta. Lacedæmon Achaiæ nobilis civitas non longè sita est, hujus conterminam, deviis abditam locis, quære Tænarum, inibi spiraculum Ditis, et per portas hiantes monstratur iter invium : cujus te limite transmeato simul commiseris, jàm canale directo perges ad ipsam Orci regiam. Sed non hactenus vacua debebis per illas tenebras incedere, sed offas polentæ mulso concretas ambabus gestare manibus, ac in ipso ore duas ferre stipes.
Jàmque confectâ bonâ parte mortiferæ viæ, continuaberis claudum asinum lignorum gerulum, cum agasone simili : qui te rogabit, decidenti sarcinæ fusticulos aliquos porrigas, sed tu nulla voce deprompta, tacita præterito. Nec mora, cùm ad flumen mortuum venies, cui præfectus Charon protinùs expetens portorium, sic ad ripam ulteriorem sutili cymba deducit commeantes. Ergò et inter mortuos avaritia vivit ? nec Charon ille, Ditis pater, tantus deus, quidquam gratuitò facit ; et pauper moriens viaticum debet quærere ; et æs si fortè præ manu non fuerit, nemo eum expirare patietur ? Huic squalido seni dabis nauli nomine de stipibus, quas feres alteram : sic tamen, ut ipse suâ manu de tuo sumat ore. Nec
