quanto jàm tempore delitescentem ancillam nequiverim reperire. Nil ergò superest, quàm tuo præconio præmium investigationis publicitùs edicere. Fac ergò mandatum matures meum, et indicia quibus possit cognosci, manifestè designes ; ne, si quis occultationis illicitæ crimen subierit, ignorantiæ se possit excusatione defendere. Et simul dicens, libellum ei porrigit, ubi Psyches nomen continebatur, et cætera. Quo facto, protinus domum secessit.
Nec Mercurius omisit obsequium, nam per omnium ora populorum passim discurrens, sic mandatæ prædicationis munus exequebatur : Si quis à fuga retrahere, vel occultam demonstrare poterit fugitivam regis filiam, Veneris ancillam, nomine Psychem, conveniat retrò metas Murtias Mercurium prædicatorem, accepturus indicii nomine ab ipsa Venere septem savia suavia, et unum blandientis adpulsu linguæ longè mellitum. Ad hunc modum pronuntiante Mercurio, tanti præmii cupido certatim omnium mortalium studium arrexerat. Quæ res nunc vel maximè sustulit Psyches omnem contationem.
Jàmque fores ejus dominæ proximanti
