L. APULEII,
MADAURENSIS PLATONICI,
METAMORPHOSEOS :
SIVE
LUSUS ASINI.
LIBER SEXTUS.
Interea Psyche variis jactabatur discursibus, dies noctesque mariti vestigationibus inquieta, animo tanto cupidior, et, iratum licet, si non uxoris blanditiis lenire, certè servilibus precibus propitiare. Et, prospecto templo quodam in ardui montis vertice : undè autem, inquit, scio, an istic meus degat dominus ? Et illicò dirigit citatum gradum : quem defectum prorsus assiduis laboribus spes incitabat, et votum. Jàmque gnaviter emensis celsioribus jugis, pulvinaribus sese proximam intulit. Videt spicas frumentarias in acervo, et alias flexibiles in corona : et spicas ordei videt, erant et falces, et operæ messoriæ mundus omnis ; sed cuncta passim jacentia, et incuria confusa, et, ut solet, æstu laborantium manibus projecta. Hæc
