Page:Apulée - Les Métamorphoses, Bastien, 1787, I.djvu/469

cam aliquam ? Prome, age tu quæ sola mihi servis amanter, nomen ejus quæ puerum ingenuum et investem sollicitavit : sive illa de nympharum populo, seu de horarum numero, seu de musarum choro, vel de mearum gratiarum ministerio. Nec loquax illa conticuit avis : Sed, nescio, inquit, domina : puto puellam, si probè memini, Psyches nomine dicitur, efflictim cupere. Tunc indignata Venus exclamavit : Vel maximè Psychem ille, meæ formæ succubam, mei nominis æmulam, verè diligit. Nimirum illud incrementum lenam me putavit, cujus monstratu puellam illam cognosceret. Hic quiritans properiter emergit à mari, suumque protinus aureum thalamum petit : et reperto, sicut audierat, ægroto puero, jàm indè à foribus quàm maximè boans : Honesta, inquit, hæc, et natalibus nostris, bonæque tuæ frugi congruentia ? Ut primùm quidem tuæ parentis, immò dominæ præcepta calcares, nec sordidis amoribus inimicam meam pollueres ; verùm etiam hoc ætatis puer, tuis licentiosis et immaturis jungeres amplexibus : ut ego nurum scilicet tolerarem inimicam. Sed utique præsumis nugo et corruptor, et inamabilis, te solum generosum, nec me jàm per ætatem posse concipere. Velim ergò scias,